ഒരുസിനിമാ പാട്ട്-
ആർ പാടി,
ആരെഴുതി,
ആർ സവിധാനം ചെയ്തു,
ഏത് പടത്തിൽ
എന്നിങ്ങനെയൊക്കെ ചോദിക്കാമെങ്കിലും
ഏത് പടത്തെ കൊഴിച്ചിട്ടാൽ തന്നെ
ഒരു പാട്ടിന്
ചുരുങ്ങിയത് മൂന്ന് സംശയങ്ങൾ സഹജം
ഇനി മലയാളത്തിന് പുറമെ
തമിഴ്, ഹിന്ദി എന്നിവകൂടി വരുമ്പോൾ
സംഗതി മാറുന്നു-
മുപ്പത്തി മുക്കോടി സംശയങ്ങളാവുന്നു
മാത്രവുമല്ല
ഏത് നേരത്തും ഇതിന് കേറി വരികയും ചെയ്യാം-
അതാണ് പ്രശ്നം
കര്യം, സംഗതി മനസ്സിലാണല്ലോ, ഏത്?
പാതിരായ്ക്ക്
നിലം തൊടാത്ത സാരിപോലെ ഒരു വരവുണ്ട്
അന്നേരം
സംശയങ്ങൾ പുംബീജങ്ങളെപ്പോലെ
വാലിളക്കിപ്പായും
അണ്ഡമാണെങ്കിൽ എപ്പോഴത്തെയും പോലെ
കണ്ടഭാവമില്ല
ഒരുസംശയം മറ്റൊരു സംശയത്തോട്
സംസാരിക്കുമ്പോൾ
മറ്റുരണ്ടുസംശയങ്ങൾ
സംസാരിക്കുന്നേയില്ല
തലപൊക്കാതെ കിടക്കുകയാണ്
ഉറക്കം നടിക്കുമ്പോൾ
കാതാണല്ലോ കണ്ണ്
ഇതൊരു രോഗമാണോ ഡോക്റ്റർ?
good
ReplyDelete